త్రిషకు బర్త్‌డే విషెస్ తెలిపిన సమంత

దక్షిణాది స్టార్ హీరోయిన్ త్రిష సోమవారం తన పుట్టినరోజు జరుపుకుంటున్నారు. ఈ సందర్భంగా ఆమెకు తోటి నటీనటులు, అభిమానుల నుంచి సోషల్ మీడియాలో శుభాకాంక్షలు వెల్లువెత్తుతున్నాయి. ప్రముఖ నటి సమంత రూత్ ప్రభు.. త్రిషను 'అద్భుత శక్తి' అంటూ ప్రశంసిస్తూ ప్రత్యేకంగా విషెస్ తెలిపారు. తన ఇన్‌స్టాగ్రామ్ స్టోరీస్‌లో, "హ్యాపీ బర్త్‌డే త్రిష. నువ్వు ఎదుగుతున్న తీరు, నిలబడుతున్న విధానం చూస్తుంటే అద్భుతంగా ఉంది. ఎప్పటికప్పుడు శక్తి పుంజుకుంటూ ఓ అద్భుత శక్తిగా నిలుస్తున్నావు" అని సమంత పేర్కొన్నారు.

మరోవైపు, త్రిష తన పుట్టినరోజును పురస్కరించుకుని తిరుమల తిరుపతి దేవస్థానంలో శ్రీవారిని దర్శించుకుని ప్రత్యేక పూజలు చేశారు. ఇదే సమయంలో ఆమె నటిస్తున్న మెగాస్టార్ చిరంజీవి 'విశ్వంభర' చిత్రం నుంచి చిత్ర యూనిట్ ఆమెకు బర్త్ డే గిఫ్ట్ ఇచ్చింది. ఈ సినిమాలోని ఆమె ఫస్ట్ లుక్ పోస్టర్‌ను విడుదల చేసింది. ఈ చిత్రాన్ని నిర్మిస్తున్న యూవీ క్రియేషన్స్, తమ ఎక్స్ ఖాతాలో పోస్టర్‌ను విడుదల చేస్తూ, "టీమ్ విశ్వంభర తరఫున అందమైన త్రిషకు పుట్టినరోజు శుభాకాంక్షలు. ఈ చిత్రంలో ఆమె పోషిస్తున్న 'అవని' పాత్ర ఎంతో ఆకర్షణీయంగా, ప్రకాశవంతంగా ఉంటుంది" అని పేర్కొంది.

'బింబిసార' చిత్రంతో సంచలన విజయం సాధించిన దర్శకుడు వశిష్టకు 'విశ్వంభర' ఒక డ్రీమ్ ప్రాజెక్ట్. ఈ చిత్రంలో త్రిష కథానాయికగా నటిస్తుండగా, ఆషికా రంగనాథ్, కునాల్ కపూర్ కీలక పాత్రలు పోషిస్తున్నారు. చోటా కె నాయుడు సినిమాటోగ్రఫీ అందిస్తుండగా, ఏఎస్ ప్రకాశ్ ప్రొడక్షన్ డిజైనర్‌గా పనిచేస్తున్నారు. యూవీ క్రియేషన్స్ బ్యానర్‌పై విక్రమ్, వంశీ, ప్రమోద్ ఈ చిత్రాన్ని భారీ బడ్జెట్‌తో, నాణ్యతలో ఏమాత్రం రాజీ పడకుండా నిర్మిస్తున్నారు. పురాణం, భావోద్వేగాలు, అద్భుతమైన విజువల్స్ కలబోతగా ఈ సినిమా ఉండనుంది.